The Abdication of Mary Queen of Scots
Tak ma croon, an dinna fash –
aa yon wis ower fur me lang syne.
Ye needna glaum at ma silk goon
wi yer coorse nieve – I’m nae threit;
I’ll sign yer muckle scroll, dae whit I maun,
past carin noo; thae last three days ma flesh
an saul hae wandert shores o hell-fire, dule an daith:
twa bairns I cradled in ma wame aa through the months,
sae douce, o Spring an Simmer; slippit cauld an stieve
intae the dowie air o Leven’s grey stane waas,
claucht frae ma jizzen, an burriet ootby, wi nae prayer,
fur aa I ken, an nae sang, twa scraps o heiven,
aa ma howp in their twin licht smoorit noo,
tho milk’s aye buckin frae ma breists unner ma lace an steys;
an I couldnae gie a fig fur yer fouterin laws,
sat there, scrieven yer Latin clatters o queens an kings –
O, I could run rings roon ilka yin o ye in Greek an aa,
as weel’s ma bonnie French, but yer naethin, naethin noo,
jist ghaists; an, och, Mary, Mary Seton, last
o ma fower leal ladies, dinna waste yer tears
oan gien up a bittie gowd an glister; haud ma airm
if it helps, but dinna, dinna greet fur this.
About this poem
Author’s note: ‘Mary Queen of Scots was imprisoned in Loch Leven Castle in 1567. She miscarried twins on 20th and 23rd July, and was forced to abdicate the day after.’