Wumman

Feart they were, yon men wha seen us
pickin herbs, mixin potions, makkin bairns
better. Ivry wan o them full o the hee-haw,
teeth clackin while we balanced the wurld
on a bawbee, poor we be, but we mak ends meet.
And they wi their fripperies n fancies
didna like whit they saw,
wumman wi brains an’ ahent oor backs
spun whispers, dark deceivings.
When a ship sank, they blamed oor breath,
een a man fa’d ill, that wir us too,
aye and him found thievin kisses
aff a wife that wisnae his.
Twas yon biddies, they telt the law wi their lyin lips.
Oor sisters, sisters, yir silence saved us
when they cam wi their pricking bodkins,
stripped ye tae naked, stickin pins to prove
yir witching ways. Strangled, tarred,
we winna forget nor forgive.
Oh that men could see the fullness
o wir guidsome powers, whispering intae
the wind to fill the sails, steer oor sailors safe,
how wi words we heal and sate,
tame the land tae bring full harvests hame.
Aft times we need release the pain
and bother o it a, shiftin oor shapes,
seekin the rhythm frae life once mair.
Spinnin in moon glow
we feel oor bonnie powers soar,
dark eyes glintin, corbie wings risin
til a of us be flyin.
About this poem
This poem was awarded first prize in the Juia Budenz Commemorative Poetry Prizes in 2024 for writing in Scots language.
Fiona said, “When I opened the email and saw ‘congratulations’ I was so chuffed. Like a lot of kids in the 60s, the words I used at home never appeared in my jotter at school and that continued in my own writing. It’s taken a long time, but this is the first poem I’ve written all in Scots, so to win first prize? Braw!”