Water-Lilies
Whin da laeves an buds o da water-lilies
Spread roond da loch der dark-green frill
I took my tushkar be Lungawater
An cöst a bank near Stoorbra Hill.
Da hill laek a kummelled boat wis lyin,
Grown ower wi moss ida lang Jöne days,
An white apo white da water-lilies
Whin du cam dere wi me ta raise.
Da stack wis beelt an da coarn gaddered
An dan I hed ta geng awa,
Bit I tink o da lilies aft wi langer,
Noo everything is smoored in snaa.
I tink o dee be da oppen fire,
As du sits an looks at da golden glöd
Laek gold ida cups o white water-lilies
Whaar I drank sweetness afore I göd.
