As I cam roon by Tinto’s back,
I heard twa cuddies haein a crack.
I heard yin tae the tither say,
‘Wha will ye tak tae ride the-day?’
‘I’ll tak nae laird wi whip and spurs,
I’ll tak nae leddy clad in furs.
But I’ll awa tae Glesca fair
Tae fetch a lass that I ken there.
‘And nane will hear me at the gate,
And nane will see me as I wait
But her alane, and she’ll come doun,
And we’ll gang through the sleepin toun.
‘We’ll ride the bents, we’ll ride the braes,
We’ll ride for nichts, we’ll ride for days.
We’ll ride the shore, we’ll ride the sea,
We’ll ride the sky, that lass and me.’
As I wis sittin late at nicht
Abune the trees I saw a sicht:
Across the mune I saw them pass,
A fleein cuddy and a lass.