The Greater Sea

Oor boat is rigged tae face the greater sea,
The day daws blithely whan we must set sail.
Hou aften hae we twa wrocht in the gale,
An waithert aa its wrath tae bear the gree?
We stievely grupt the tiller, haund oan haund,
Held firmly tae the course that we hud chosen;
Be’t sauf bield o the loch, else sea, or ocean,
Nae maitter! We wid siccarly mak laund!
An mony’s the lauch we hud alang the wey,
We caredna dael-a-hate the haund fate gien us,
But made the best o’t, kennin fine atween us
The bonds o luve we hud wid aye haud sway .
Ayont the faur horizon Venus lowes,
The Cosmos beckons tae us; pynt the prow!