Fou Muin

(efter Munestruck by Hugh MacDiarmid)

Her siller ee, wide appen,
leukin doon the nicht on me;

an I mind hoo she claucht us 
lang syne, stuid here 
in the haa bi the winnock, 
the drapes no yit drawn ower. 
We were passin ilk ither, 
frae chaumer tae chaumer,
snecked in oor ain warlds –
ootrels aamaist wi oor darg;
but we stapped stane-still,
an spak nae wird in the beam 
o her cauld sairch-licht,
haudin fierce an ticht 
tae yin anither, 
marra tae marra,
wi a suddent kennin 
that oor vaige thegither 
on this birlin mote 
wis nae mair nor 
a blenk o her ee;

her cauldrif ee, 
leukin doon the nicht 
on yer lair-stane, 
time, an me.