Wha’s Doctor Wha? Wha better kens nor he
that jouks the yetts and rides the birlin wheels
o time and space, shape-shiftin as he reels
through endless versions o reality?
Bit dis he ken himsel? Weel, mibbe sae,
yet wha’s tae ken gin aw that’s kent by Wha
maks mair or less or better sense ava
nor whit we ithers ken, or think we dae?
The universe is fou o parallels:
wha’s like us? Hunners? Thoosans? We oorsels
micht be mere glisks o life-forms yet tae be.
Whit’s real? Whaur’s here? When’s noo? Wha’s quick or deid?
Wha’s jist a thoctie in anither’s heid?
Wha’s Doctor Wha? Wha better kens nor s/he?
About this poem
This poem was selected for National Poetry Day 2018.