Caald Clods an Tinder

It rises up aboot me laek a tick mist, 
It wipples roond me feet laek snüddit oo,
Wi oot-straetched haand I grop me wye afore me,
No far fae da aidge o da slippery, steep banks broo.

Da watter rins oota me een an blinds me,
Da wind fae aest an wast an nort an sooth,
Screichs atti me lugs laek tirn witches
Whistlin atween da bittles i dir mooth.

Numbed ta da marrow. Bluid laek burn watter.
Strent an resistance ebb laek da first Voar tide.
I crumple, feelin naethin onny mair,
An kloor da sokkin aert doon be me side.

Een slowly oppen wi da first light idda moarneen;
I waatch da sun come up laek sheenan bress;
I rise up ta me knees an look aboot me,
An winder at da calm an peacefulness.

Dan as da day wears on da sun gits brighter,
I fin revived atti da waarm ün
I win ta me fit, shak da hair atto me een,
Dan lift me head up high an look abün.

An very shün I realise A'm singin,
As I waatch da birds glide by idda wide blue sky.
Life an its livin eence again is mine, 
An da darkness o da night is woarn by.