Aald Boat

Doo minds dee, whan da wind stöd wast,
I’d lay twa linns, and rin dee doon,
An tak a stane, an step dy mast,
An had dy head fir oot da soon’.

We’d land is doon by Heljer Gjo,
An bare tak time ta mak dee fast,
Saw weel kent we foo aa da voe
Wis scanned whan winds held fae da wast.

Aald boat, doo’s i’dy last noost noo,
Da waandrin sea nae mair doo’ll ken,
Nae mair sall I, dy capten, crew,
Set up dy aald broon sail agen.

Bit tho, fir is, oot ower da voe,
Nae lingrin, lanesome look is cast
Saft rins da sea in Heljer Gjo,
And saft da wind blaas fae da wast.