Langsyne, When Life was Bonnie

Langsyne, When Life was Bonnie
Langsyne, when life was bonnie, 
   An' a' the skies were blue, 
When ilka thocht took blossom, 
   An' hung its heid wi' dew, 
When winter wasna' winter, 
   Though snaws cam' happin doon, 
Langsyne, when life was bonnie, 
   Spring gaed a twalmonth roun’. 

Langsyne, when life was bonnie, 
   An' a' the days were lang; 
When through them ran the music 
   That comes to us in sang, 
We never wearied liltin' 
   The auld love-laden tune; 
Langsyne when life was bonnie, 
   Love gaed a twalmonth roun'. 

Langsyne, when life was bonnie, 
   An' a' the warld was fair, 
The leaves were green wi' simmer, 
   For autumn wasna there. 
But listen hoo they rustle, 
   Wi' an eerie, weary soun', 
For noo, alas, 'tis winter 
   That gangs a twalmonth roun'. 
Alexander Anderson
Alexander Anderson

Railwayman, poet and librarian, Alexander Anderson was the author of the famous poem about the wakeful bairnies, 'Cuddle Doon'. 

Read more about this poet